Puitu (counselor) te chuan hriatthiamna thinlung nen anmahni berâwntu (clients) te chu theihtawp chhuaha lo dawnsawn leh eng harsatna chiah nge chumi chuan a hmachhawn a, a rilru, thinlung leh ngaihtuahna te, eng ang chiahin nge a nghawng tih te chu ṭawngka (verbal) emaw ziak emaw, hmanrua (non-verbal) dangte hmanga in biak pawh (communicate) na neih a ni ṭhin.
He thurawn (counseling) hi tu tan pawh a mamawhtu apiang tan a theih vek a, kum bithliah emaw a hmei a pa (gender) emaw tan bik tih a awm chuang lo a ni. Tu pawh, hringnunah a ṭha lam zawnga ke pen tum te, ngaihtuahna leh rilru thlamuanna zawngtu tan te, harsatna leh beidawnna hmachhawn mek te, hlawhtling tura bei mektu tan leh, mahni infuih thar nana hmang duhtu tan te, rilru leh taksa chak zawk leh huaisen zawnga nun hman a nih theih nan a pawimawh em em a ni.
Kan hriat tur pawimawh em em mai, mi tam takin an hriat ṭhelh leh fuh tawk lo ṭhin chu, rilru lam harsatna (mental health) miin a tawh hian Professional Counselor/psychologist (zirmi/hetiang lama mithiam) te pan hreh emaw thiam tawk lo anga ngaihna avangin Psychiatrists (doctors) kher te an pan nghal rum rum mai ṭhin. Psychiatrists-te hi chu medical doctor (damdawi lam thiam) an nih avangin, kan harsatna tawh a kha non-clinical (thluak lam aṭanga fel lohna) mental health a nih kher loh chuan Professional counselor-te hi pan/rawn a him a ni.
Psychiatrist-te erawh chu medical doctor an nih angin Neuropharmacological hmanga damlo te enkawl theihna (certified) an nei a, chu enkawlna mamawhtu te chu professional councelor-te hian an mahni pantu te nen hun engmaw chen inkawmna (therapy sessions) an neih hnuin an kawh hmuh ta zawk ṭhin a ni. Professional counselor te hian damdawi tel loa kan harsatna te chin fel a nih theih nan theihtawp an chhuah ṭhin a ni.
Inkawmna/thurawn sawina hun (therapy sessions) a kamchhuak reng reng hi thup tlat (confidential) a ni ngei ngei tur a ni.